உயர் அடர்த்தி ரயில் பாதைகளுக்கு மின் இயக்கத் திட்டத்திற்கு இலங்கை அமைச்சரவை ஒப்புதல்

இலங்கையின் உயர் பயணியர் அடர்த்தி கொண்ட மூன்று முக்கிய ரயில் பாதைகளை மின்மயமாக்குவதற்கான திட்டத்திற்கு அமைச்சரவை ஒப்புதல் அளித்துள்ளது. 

மருதானை-ராகம பிரதான பாதை, மருதானை-மாகும்புர களனிவெளி  பாதை மற்றும் மருதானை-பாணந்துறை கரையோர பாதை ஆகியவை இந்த மின் இயக்கத் திட்டத்திற்காக அடையாளம் காணப்பட்டுள்ளன. 

மேலும், கம்பஹா, வெயங்கொட, மீரிகம மற்றும் பொல்கஹவெல ஆகிய இடங்களில் பாதையமைப்பு மேம்படுத்தும் பணிகளும் மேற்கொள்ளப்படும். 

தற்போது இலங்கையின் பெரும்பாலான ரயில் போக்குவரத்து டீசல் எரிபொருளால் இயக்கப்படுகிறது. இயக்க திறன் மற்றும் சேவை நம்பகத்தன்மையை மேம்படுத்த பல ரயில் பாதைகள், சமிக்ஞை அமைப்புகள் மற்றும் தொடர்புடைய உள்கட்டமைப்புகளை மேம்படுத்த வேண்டிய அவசியம் இருப்பதாக அமைச்சரவை  சுட்டிக்காட்டியுள்ளது.

புதிய ரயில் பாதைகள், இரட்டைத் தண்டவாளங்கள் மற்றும் மேம்படுத்தப்பட்ட சமிக்ஞை அமைப்புகளில் கவனம் செலுத்தி, நவீன மற்றும் நிலையான போக்குவரத்து அமைப்பைக் கட்டமைப்பதை அரசாங்கம் நோக்கமாகக் கொண்டுள்ளது. 

அதிக பயணியர் அடர்த்தி கொண்ட பாதைகள் மின்மயமாக்கலுக்காகத் தேர்ந்தெடுக்கப்பட்டுள்ளன. "அதற்கமைய, போக்குவரத்துத் திறனை மேம்படுத்துதல், பயண நேரங்களைக் குறைத்தல் மற்றும் சுற்றுச்சூழலுக்கு உகந்த மற்றும் நிலையான பொதுப் போக்குவரத்து சேவையை ஆதரித்தல் ஆகிய நோக்கங்களுடன் அதிக பயணியர் அடர்த்தி கொண்ட பாதைகள் மின் இயக்கத்திற்காக அடையாளம் காணப்பட்டுள்ளன" என்று அமைச்சரவை  குறிப்பிட்டுள்ளது. 

இந்த அபிவிருத்தி நடவடிக்கைகள், நாட்டின் பரந்த போக்குவரத்து நவீனமயமாக்கல் உத்தியின் ஒரு பகுதியாக, சர்வதேச அபிவிருத்தி நிறுவனங்களின் ஆதரவுடன் செயல்படுத்தப்படும். போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சரால் சமர்ப்பிக்கப்பட்ட திட்டத்திற்கு அமைச்சரவை ஒப்புதல் அளித்துள்ளது.