இலங்கை சுற்றுலா வருமானக் கணிப்பு முறை திருத்தம் - ஜனவரி 2026 முதல் பின்னோக்கிப் பயன்பாடு

இலங்கை சுற்றுலா மேம்பாட்டு அதிகாரசபை (SLTDA) தனது மாதாந்திர சுற்றுலா வருமான மதிப்பீட்டு முறையை மே 2026 இல் திருத்தியமைத்துள்ளது. இந்த மாற்றம், மதிப்பீடுகளின் துல்லியத்தையும் பிரதிநிதித்துவத்தையும் மேம்படுத்தும் நோக்கில் மேற்கொள்ளப்பட்டதாக மத்திய வங்கி தனது வாராந்திர பொருளாதார குறிகாட்டிகளில் தெரிவித்துள்ளது.

பிப்ரவரி 28 ஆம் திகதி அமெரிக்கா மற்றும் இஸ்ரேல் ஈரான் மீது நடத்திய குண்டுவீச்சைத் தொடர்ந்து, மார்ச் மற்றும் ஏப்ரல் மாதங்களில் சுற்றுலா வருமானம் முறையே 37 சதவீதமும் 38.8 சதவீதமும் சரிந்ததை அடுத்தே இந்தத் திருத்தம் மேற்கொள்ளப்பட்டுள்ளது.

புதிய முறையானது, சுற்றுலாப் பயணிகள் வருகை, சராசரி தினசரி செலவு மற்றும் சராசரி தங்கும் காலம் ஆகியவற்றில் நாட்டிற்கு ஏற்ற தரவுகளை இணைப்பதன் மூலம் மதிப்பீடுகளின் துல்லியத்தை அதிகரிப்பதாக மத்திய வங்கி தெரிவித்துள்ளது. எனினும், திருத்தப்பட்ட முறையில் பயன்படுத்தப்பட்ட புதிய சராசரி தினசரி செலவு மற்றும் சராசரி தங்கும் காலம் குறித்த விவரங்களை SLTDA வழங்கவில்லை.

திருத்தப்பட்ட முறையானது 2026 ஜனவரி முதல் மாதாந்திர மதிப்பீடுகளுக்குப் பின்னோக்கிப் பயன்படுத்தப்பட்டுள்ளது. இதன் விளைவாக, இந்த ஆண்டின் முதல் நான்கு மாதங்களுக்கான மதிப்பீடுகள் திருத்தப்பட்டுள்ளன. அதன்படி, ஜனவரி மாத வருமானம் முன்னர் 378 மில்லியன் அமெரிக்க டொலர்களாக இருந்த நிலையில், 413.8 மில்லியன் அமெரிக்க டொலர்களாகவும், பிப்ரவரி மாத வருமானம் 352 மில்லியன் அமெரிக்க டொலர்களில் இருந்து 381.4 மில்லியன் அமெரிக்க டொலர்களாகவும் திருத்தப்பட்டுள்ளது.

மார்ச் மாத வருமானம் 223.7 மில்லியன் அமெரிக்க டொலர்களில் இருந்து 244.8 மில்லியன் அமெரிக்க டொலர்களாகவும், ஏப்ரல் மாத வருமானம் 157.1 மில்லியன் அமெரிக்க டொலர்களில் இருந்து 164.3 மில்லியன் அமெரிக்க டொலர்களாகவும் உயர்த்தப்பட்டுள்ளது.

கடந்த ஆகஸ்ட் மாதம் மேற்கொள்ளப்பட்ட புதிய கணிப்பின்படி, ஒரு சுற்றுலாப் பயணியின் தினசரி செலவு 171 அமெரிக்க டொலர்களில் இருந்து 148 அமெரிக்க டொலர்களாகக் குறைக்கப்பட்டுள்ளது. சுற்றுலா வருமானம் SLTDA நடத்தும் கணிப்புகளின் அடிப்படையில் மதிப்பிடப்படுகிறது.